Студентската листа во Србија претстави план за модернизација на вооружените сили, кој предвидува значително зголемување на воениот буџет, повисоки плати за војниците и набавка на современо вооружување.
Поранешниот офицер на српската армија и претставник на Студентската листа, Лука Понорац, во гостување на РТС изјави дека целта е издвојувањата за одбраната постепено да достигнат пет проценти од бруто-домашниот производ.
Според предложената програма, платите на припадниците на војската би се зголемиле за 20 до 30 проценти, со поправедна распределба на примањата меѓу различните воени чинови и служби.
Еден од најзначајните приоритети е набавката на ракетна артилерија со дострел од 150 до 300 километри, како и изградба на современ систем за противвоздушна одбрана со краток, среден и долг дострел.
Планот предвидува и набавка на беспилотни летала, развој на системи за воздушно набљудување и подобрување на воените комуникациски и командни капацитети.
Понорац нагласи дека реализацијата ќе зависи од финансиската состојба и расположливите човечки ресурси во Министерството за одбрана и Војската на Србија.
Студентската листа најавува и зајакнување на воените стручни институции, како и преиспитување на евентуалните незаконитости во работата на безбедносните служби.
