Група од околу десетина маскирани лица брутално нападнала сопственик на угостителски објект и четворица гости – воени ветерани кои го поддржуваат студентскиот протест и присутните граѓани.
Напаѓачите, вооружени со бејзбол палки и пендреци, безмилосно ги удирале жртвите, а еден од нив бил сериозно повреден кога добил удар со кундак од пиштол по главата.
Според извори на порталот Nova, инцидентот се случил околу 19 часот во локал на Савски венец. Сите петмина повредени се пренесени на ВМА, каде што им се укажува лекарска помош.
Нападот уследил по расправија со „Кобри“
Адвокатот Предраг Марковиќ, кој бил во контакт со повредените, изјави дека најверојатно некои од жртвите имаат тешки телесни повреди, меѓу кои скршена вилица и рака.
„Сите се брутално претепани, видливи се хематоми и подуености на лицата. Некои едвај зборуваат. Околу еден час пред нападот, тие снимале припадници на единицата ‘Кобри’ и имале вербална расправија со нив, по што седнале во локалот. После час време, маскираните напаѓачи влегле и веднаш почнале да удираат,“ раскажува Марковиќ.
„Повредените тврдат дека биле нападнати веднаш од вратата, а првата жртва била удрена од зад грб – што укажува дека нападот бил испланиран. Удирале со пендреци, бејзбол палки, а еден добил удар со пиштол по главата. Најмалку двајца изгубиле свест од ударите. Насилството беше шокантно“, додава адвокатот.
Сериозни повреди кај ветераните
Марковиќ веднаш се упатил кон Воено-медицинската академија, каде што повредените добиле прва помош и биле подложени на медицински прегледи.
„Сите ќе мора да направат скен на главата поради сомнеж за можно внатрешно крвавење. Повредите се сериозни. Полицијата го зема исказот и им наложи на повредените да дадат изјави следниот ден, но дали сите ќе бидат способни да зборуваат поради степенот на повредите е неизвесно. Станува збор за крвнички напад,“ заклучува адвокатот.
