По изборниот пораз на Александар Вучиќ во Србија, неговата изјава во која ја спомена Наташа Кандиќ предизвика реакции во јавноста. Основачката на Фондот за хуманитарно право и долгогодишна критичарка на српските власти сега остро одговори на неговите зборови.
„Ѝ честитам на Наташа Кандиќ, нејзината политика победи“, изјави Вучиќ иронично при обраќањето во кое го призна поразот на својата листа.
Во интервју за „Јутарњи лист“, Кандиќ оцени дека Вучиќ со години го користел нејзиното име за да ги дискредитира политичките противници, а особено студентското движење.
„Почна како светски политичар, а заврши како кочијаш“
Кандиќ го коментираше и начинот на кој Вучиќ го призна изборниот пораз.
Според неа, неговото обраќање започнало мирно, со честитки до победниците, но набргу преминало во политички обвинувања.
„Почна како светски политичар, а заврши како кочијаш“, оцени Кандиќ.
Таа смета дека убедливата разлика во гласовите го ограничила просторот за оспорување на изборните резултати.
„Насилство врз младите никој немаше да му прости“
Кандиќ предупреди дека евентуални насилни инциденти против граѓаните кои ја славеле победата на Студентската листа би можеле да имаат сериозни политички последици.
„Да предизвикаа неговите приврзаници хаос, насилство, ранување или убивање млади луѓе, никој немаше да му прости“, изјави таа.
Победата е само почеток
И покрај задоволството од изборниот исход, Кандиќ смета дека пред новата власт стојат големи предизвици.
Како најважни ги посочи воспоставувањето владеење на правото, борбата против корупцијата, слободата на медиумите и соочувањето со военото минато.
Таа го истакна и неуспехот на Социјалистичката партија на Србија, која според прелиминарните резултати не го поминала изборниот праг.
„Сè уште не знаеме колкав е трансформативниот потенцијал на Студентската листа и до каде може да оди“, порача Кандиќ.
Според неа, изборната победа не значи крај на проблемите, туку почеток на долгорочен процес на промени во српското општество.
