Засилени инспекциски контроли кај производителите на сладолед и слаткарски производи во Србија открија бројни неправилности, поради што беа изречени забрани за производство, поведени прекршочни постапки и повлечен дел од производите од продажба.
Министерството за земјоделство, шумарство и водостопанство соопшти дека во текот на јуни биле извршени 62 инспекциски надзори со цел да се провери безбедноста на храната и почитувањето на законските прописи.
Инспекторите утврдиле дека:
- три производители не биле запишани во Централниот регистар на објекти,
- четири не ги декларирале правилно производите,
- 14 немале лабораториски извештаи за здравствената исправност на сладоледот,
- седум имале пропусти во следливоста на производите,
- кај четири биле утврдени недостатоци во хигиенските услови,
- а дури 15 производители не го применувале правилно HACCP-системот за безбедност на храната.
Поради утврдените неправилности, инспекцијата донела 31 решение за отстранување на недостатоците, поднела пет прекршочни пријави, изрекла три забрани за производство и повлекла 30 килограми сладолед од продажба.
Од Министерството посочуваат дека, и покрај констатираните пропусти, годинава е забележано подобрување во споредба со претходните години, особено во делот на хигиената, следливоста и правилното декларирање на производите.
Министерот за земјоделство Драган Гламочиќ најави дека засилените инспекциски контроли ќе продолжат и во текот на јули и август, нагласувајќи дека безбедноста на храната останува еден од главните приоритети.
Воедно, надлежните апелираат граѓаните во летниот период лесно расипливите производи да ги купуваат исклучиво од регистрирани продажни места, внимателно да ги проверуваат рокот на употреба, декларацијата и условите на чување, а разладената и замрзнатата храна што е можно побрзо да ја складираат во фрижидер или замрзнувач.
