Алта банка одговори на прашањата на „Форбс Србија“ во врска со одлуката на Народната банка на Србија да ѝ ја одземе дозволата за работа, по што соопшти дека дел од банкарските услуги веќе се суспендирани.
Во одговорот, банката ги информираше клиентите дека моментално не се достапни трансакциите со платежни картички, домашниот платен промет, како и девизниот платен промет.
Дополнително, од банката потврдија дека и нивните експозитури во моментов не работат, согласно одлуката донесена од Народната банка на Србија.
Во продолжение, одговорот на Алта банка го пренесуваме во целост:
„Ви благодариме за трпението и разбирањето. Ве известуваме дека, согласно официјалното известување на Народната банка на Србија, во моментов се суспендирани активностите поврзани со платежните картички, домашниот платен промет и девизниот платен промет.
Исто така, експозитурите во моментов не работат, согласно одлуката на Народната банка на Србија.
Ве известуваме дека исплатата на осигурените депозити започнува од понеделник, согласно процедурите и инструкциите на надлежните институции.
Ве молиме за разбирање и ви благодариме за укажаната доверба“, се наведува во одговорот на банката, објавен од „Форбс Србија“.
