Голем шумски пожар што избувна меѓу местата Смоквица и Блато на хрватскиот остров Корчула и понатаму е активен, а надлежните предупредуваат дека ситуацијата останува исклучително сериозна.
Според командантот на Противпожарната заедница на Дубровничко-неретванската жупанија, Стјепан Симовиќ, двата одделни пожари што избувнале во овој регион се споиле во еден огромен огнен фронт кој се протега на повеќе од три километри.
Во текот на ноќта на терен биле ангажирани околу 170 пожарникари кои се обидувале да го стават пожарот под контрола. Освен противпожарните екипи од Корчула, помош пристигнала и од Пељешац, Конавле, Жупа Дубровачка, Дубровник, како и од Интервентната противпожарна единица од Слано.
Главниот противпожарен командант наредил и дополнително испраќање пожарникари од повеќе жупании на копното поради сериозноста на состојбата.
Гаснењето е дополнително отежнато поради непристапниот терен и густата борова шума. Во текот на денот во борбата со огнот биле вклучени три противпожарни авиони „Канадер“, а за недела наутро е најавено пристигнување на уште четири авиони.
„На разденување ќе пристигнат два канадери, а подоцна уште два, така што во текот на утрото ќе имаме четири авиони на располагање“, изјави Симовиќ.
И покрај големите површини зафатени со огнот, засега нема информации дека се загрозени куќи и станбени објекти. Сепак, пожарникарите предупредуваат дека поради големината и непредвидливоста на пожарот, ситуацијата може брзо да се промени.
„Во моментов куќите не се во опасност, но кај пожар од вакви размери не можеме ништо да тврдиме со сигурност“, посочи Симовиќ.
Според првичните проценки, загрозени биле дел од лозовите насади, а најверојатно изгореле и одредени маслинови насади меѓу Смоквица и Блато.
Огнот ја преминал и државната сообраќајница која ги поврзува Корчула и Вела Лука, поради што патниот правец бил затворен за сообраќај. Локалните власти ги повикаа жителите и туристите да не се приближуваат до пожариштето и да ги следат само официјалните информации од надлежните служби.
Според првичните сомнежи, можно е пожарот да бил предизвикан од удар на гром за време на невремето што ја зафати Далмација. Сепак, точната причина ќе биде утврдена по завршувањето на истрагата.
Пожарникарите предупредуваат дека иако ветерот моментално е послаб, секоја промена на временските услови може повторно да ја влоши состојбата и да го отежне справувањето со еден од најголемите пожари што ова лето ја погодија хрватската јадранска област.
