Српските власти најавија нов пакет строги мерки за спречување на ширењето на африканската свинска чума, меѓу кои и привремена забрана за берење вргањ и други шумски печурки во најризичните подрачја.
Одлуката е донесена по итниот состанок во Владата, каде беше оценето дека вирусот продолжува да се шири, а една од главните опасности претставува неговото пренесување преку обувки, облека и опрема на луѓе кои престојуваат во шумските подрачја каде се движат диви свињи.
Покрај ограничувањето за движење низ шумите, се разгледува и формирање таканаречени „тампон-зони“ околу големите комерцијални фарми, во кои би било забрането одгледување свињи на помали земјоделски стопанства. Целта е да се намали ризикот од внесување на вирусот во големите производствени капацитети.
Како едно од најкритичните жаришта е посочено подрачјето на Обреновац, каде веќе се еутаназирани повеќе од 12.000 свињи. Активни жаришта се регистрирани и во Сремскиот и Мачванскиот округ, делови од Колубарскиот округ, како и во околината на Велика Плана.
Надлежните потсетуваат дека африканската свинска чума не е опасна за луѓето, но претставува сериозна закана за домашните и дивите свињи. Бидејќи против болеста не постои вакцина, институциите апелираат на строго почитување на биосигурносните мерки и навремено пријавување на секој сомнителен случај.
