Петгодишно момче трагично го загуби животот во аква паркот „Југово“ во Смедерево, Србија, а надлежните институции спроведуваат истрага за да ги утврдат сите околности под кои се случила несреќата.
По трагичниот настан, застапниците на аква паркот изразија длабоко сочувство до семејството на детето, оценувајќи дека станува збор за ненадоместлива загуба.
Во соопштението наведуваат дека безбедноста на посетителите, особено на децата, отсекогаш била нивен највисок приоритет и тврдат дека во комплексот бил ангажиран поголем број спасувачи од законски пропишаниот минимум, со цел да се намали ризикот од несреќи.
Од управата истакнуваат дека целосно ја поддржуваат работата на истражните органи и најавуваат целосна соработка, вклучително и доставување на целата потребна документација и информации.
Воедно, тие апелираат да се почитува презумпцијата на невиност, нагласувајќи дека евентуалниот притвор на одговорните лица би претставувал процесна мерка, а не доказ за нивна кривична одговорност.
Надлежните органи продолжуваат со истрагата, која треба да утврди како дошло до трагедијата и дали постои евентуална одговорност. Засега не се соопштени официјални резултати од истражната постапка.
