Нови тензии во Србија по изборната победа на Студентската листа. Граѓански организации, новинарски здруженија и претставници на студии по новинарство најавија иницијатива за одземање на дозволата за емитување на телевизијата Информер.
Иницијативата треба да биде доставена до Регулаторното тело за електронски медиуми (РЕМ), поради, како што тврдат организаторите, долгогодишно и систематско прекршување на законите и програмските обврски.
„Да немаше камери, ќе ме убиеја“
Во меѓувреме, сопственикот и главен уредник на Информер, Драган Ј. Вучиќевиќ, се огласи по упадот на демонстрантите во редакцијата во Белград.
Тој изнесе сериозни обвинувања, тврдејќи дека демонстрантите се обиделе да ја запалат зградата и дека неговиот живот бил загрозен.
„Првиот ден по нивната студентска победа се обидоа да ме линчуваат. Да немаше камери, ќе ме убиеја“, изјави Вучиќевиќ.
Според неговите тврдења, биле оштетени компјутери, камери и друга телевизиска опрема, а материјалната штета изнесувала десетици илјади евра.
Наводите за обид за подметнување пожар и закани по неговиот живот засега не се независно потврдени.
Студентската листа се огради од упадот
Студентската листа, која според објавените прелиминарни резултати освоила 52,71 проценти од гласовите и 140 пратенички мандати, соопшти дека не поддржува упади во медиуми и институции.
„Медиумите ќе ги ослободуваме во Собранието, преку институционална борба за слобода и професионално новинарство“, порачаа од Студентската листа.
Иницијаторите за одземање на дозволата на Информер нагласуваат дека бараат институционално постапување поради наводни прекршувања на медиумските прописи.
Покренувањето иницијатива не значи дека дозволата на телевизијата веќе е одземена. За евентуални санкции треба да одлучуваат надлежните институции.
