Протестите на грчките земјоделци поради доцнењето на исплатите на субвенциите од Европската Унија денес се проширија во областа на Солун. Колони од трактори стигнаа до наплатната рампа Малгара и го блокираа сообраќајот на националниот автопат кон Атина. Првично, полицијата го затвори пристапот и не дозволи тракторите да поминат, но подоцна конвојот, придружуван од полицијата, стигна до наплатната рампа и постави блокада.
Околу 11:20 часот правецот кон Атина беше целосно затворен, а кратко потоа и двата правци на националниот пат беа парализирани. Во меѓувреме, земјоделците од источен Солун најавија дека ќе им се придружат на своите колеги од Халкидик за заедничка блокада во среда.
Земјоделците низ целата земја ги блокираа клучните патишта во знак на протест поради високите трошоци за производство, ниските цени на земјоделските производи и доцнењето на владините плаќања. На автопатот Атина–Солун, во областа Лариса, блокадата целосно го запре сообраќајот, а полицијата ги пренасочуваше возилата кон алтернативни патишта.
Земјоделските здруженија предупредија дека доколку нивните барања не бидат исполнети, протестите ќе продолжат и ќе се прошируваат. За време на првиот ден од протестите, тројца земјоделци беа уапсени, а четири лица беа повредени – двајца земјоделци и двајца полицајци.
Протестите доаѓаат во време кога траат истраги за наводни измами со земјоделски субвенции, во кои дел од земјоделците фалсификувале сопственост на земјиште и добиток за да добијат пари од Европската Унија. Блокадите беа засилени по апсењата минатата недела, како дел од истрагата за милионска измама. Прелиминарната истрага на канцеларијата на европскиот обвинител (ЕППО) утврдила дека 324 лица примиле вкупно 19,6 милиони евра нелегални субвенции.
