Минатата недела, американскиот претседател Доналд Трамп се обиде да го убеди венецуелскиот лидер Николас Мадуро да ја напушти земјата, според информации на „Мајами Хералд“. Мадуро одби, по што Трамп најави проширување на воените операции – од таргетирање бродови обвинети за шверц со дрога до можни напади во Венецуела.
Извор запознаен со разговорот тврди дека повикот бил последен обид да се избегне директен конфликт, но преговорите не успеале. Мадуро побарал амнестија за себе и соработниците, контрола врз армијата и дополнително време за оставка, што Вашингтон не го прифатил. Ситуацијата ескалираше откако Трамп објави дека воздушниот простор на Венецуела е „целосно затворен“, по што Мадуро повеќе не можел да контактира со Белата куќа.
Каракас ја нарече одлуката „непријателски чин“ и кршење на суверенитетот. САД веќе уништија повеќе од 20 бродови и убија десетици луѓе поврзани со трговијата со дрога, иако голем дел од фентанилот доаѓа од Мексико, а кокаинот од другата страна на Тихиот Океан.
Стејт департментот го означи таканаречениот „Картел на сонцето“ како странска терористичка организација, ставајќи го Мадуро во иста категорија како лидерите на ИСИС, што овозможува на американскиот претседател да повика овластување за употреба на воена сила (AUMF) без формално објавување на војна.
Во исто време, САД го испратија најголемиот воен контингент во регионот на Карибите во последниве децении – носачот на авиони USS Gerald R. Ford, воени бродови, подморница и авиони F-35. Целта останува промена на режимот и намалување на влијанието на Русија и Кина во Венецуела.
Експертите предупредуваат дека копнената инвазија би била комплицирана поради милициите, колумбиските герилци и дел од цивилите вооружени од владата. Сепак, мнозинството население наводно би го поддржало соборувањето на Мадуро, што би го забрзало падот на армијата.
Главна пречка за Трамп доаѓа од јавноста во САД, каде анкетите покажуваат противење на воена интервенција, а неговата политичка база отфрла испраќање трупи во странство. Аналитичарите сметаат дека најверојатно сценарио е континуиран психолошки притисок и можни ракетни напади, со надеж дека Мадуро ќе се повлече или ќе биде соборен од генералите.
