Цените за изнајмување лежалки на црногорското приморје повторно ја брануваат јавноста, додека првите туристи веќе ги исполнуваат плажите и ја стартуваат летната сезона.
Иако официјално сезоната е во почетна фаза, плажите во Црна Гора веќе се полни со посетители од различни земји. Сонце, топло море и летна гужва ја најавуваат уште една интензивна туристичка година, но вниманието на многумина повторно е насочено кон – цените на плажа.
Дел од туристите реагираат дека изнајмувањето лежалки е прескапо, посебно на популарните локации. Некои дури прават споредби со други медитерански земји, наведувајќи дека за слични пари во Шпанија или Турција може да се добие и целодневен пансион.
Од друга страна, закупците на плажите тврдат дека цените речиси не се менуваат во однос на минатата година. Според нив, основен сет од две лежалки и чадор се движи околу 18 до 20 евра, додека балдахин може да чини и до 25 евра. За поудобно дневно уживање, на некои локации трошокот може да достигне и околу 60 евра.
И покрај критиките, закупците се оптимисти и очекуваат подобра сезона од ланската, со поголем број туристи и зголемен промет. Од јавното претпријатие кое управува со крајбрежјето велат дека оваа година се очекуваат значајни приходи од закуп на плажите, проценети на десетици милиони евра.
Сепак, не изостануваат и забелешки. Закупците најчесто се жалат на лоша инфраструктура, недоволно паркинг места и пристапни патишта до одредени плажи, додека надлежните уверуваат дека во тек се инвестиции и подобрувања на целиот крајбрежен појас.
Сезоната штотуку почнува, но дебатата за цените веќе е во полн ек.
