Необична временска појава ја изненади Црна Гора, откако снег завеа на планината Бјеласица и ги побели највисоките врвови иако календарски сè уште е лето.
Снежни врнежи се забележани на локалитетот Зекова Глава, каде што поради наглиот пад на температурите планинските предели добија зимски изглед.
Според метеоролошките информации, промената на времето е предизвикана од продор на значително постудена воздушна маса што зафати голем дел од регионот, носејќи нагло заладување.
Фотографии и видеа од заснежените врвови брзо се проширија на социјалните мрежи, а меѓу нив е и снимката објавена од популарната страница „Podgorica Time Machine“, која привлече големо внимание.
Метеоролозите претходно најавија претежно облачно време во северните делови на Црна Гора со повремени врнежи од дожд, а во повисоките предели условите овозможија дождот да премине во снег.
Во текот на денот се очекува постепено стабилизирање на времето и делумно разведрување. Дневните температури во северните делови на земјата се движат од 13 до 22 степени, додека во останатите региони достигнуваат до 29 степени.
