Млада девојка од Белград го сподели своето вознемирувачко искуство од сезонска работа во околината на Макарска, со цел да ги предупреди сите девојки да бидат особено внимателни кога прифаќаат работа кај непроверени работодавци.
Таа раскажува дека уште во март договорила работа како хостеса во ресторан, со однапред утврдени услови, плата и работно време. За неа дури била обезбедена и работна дозвола, па верувала дека сè е регуларно.
Но, веднаш по пристигнувањето на хрватското приморје, наместо ветената работа, ја дочекало непријатно изненадување.
Според нејзината исповед, работодавачот – маж постар од 70 години – уште при првата средба ѝ соопштил дека нема работа како хостеса и почнал да ја навредува и омаловажува.
И покрај тоа, таа прифатила да работи како чистачка седум часа дневно за истата плата што претходно ѝ била ветена.
Ситуацијата дополнително се влошила кога работодавачот почнал да ѝ поставува лични и непримерни прашања, меѓу кои дали има момче и каков е нејзиниот љубовен живот. Откако му одговорила дека не ја интересираат несериозни врски, тој, како што тврди, ѝ рекол дека „во ништо не се согласуваат“.
Најголемиот шок следувал кога ја одвел до сместувањето.
Наместо посебна соба, работодавачот ѝ соопштил дека нема слободен простор за работниците и ја сместил во својата лична соба. Во неа имало голем брачен кревет за него и мал кревет, оддалечен само неколку чекори, на кој таа требало да спие.
Девојката вели дека била преплашена и цел ден плачела. Дополнително ја вознемирило тоа што работодавачот не ѝ оставил ниту клуч за да може да се заклучи.
Подоцна, разговарајќи со друг вработен, дознала дека работодавачот и претходно наводно им плаќал на девојки за интимни услуги, поради што уште повеќе се исплашила.
По непроспиената ноќ, следното утро повикала такси, го блокирала работодавачот на сите комуникациски канали и веднаш си заминала.
„За среќа, ништо не ми се случи, но можеше да заврши многу полошо“, вели таа.
На крајот, таа упати апел до сите кои планираат сезонска работа во странство да не прифаќаат непроверени понуди, особено ако патуваат сами, туку секогаш да се информираат однапред и, доколку е можно, да одат преку препорака или со доверливо друштво.
