Властите на Катар утрово евакуираа делови од областа Мшеиреб во Доха, каде се наоѓаат владини институции и регионалната канцеларија на Google. Евакуацијата опфатила и дел од реонот каде се сместени шест американски универзитети.
Според очевидци, во главниот град се слушнале експлозии, додека евакуацијата била спроведена околу еден час пред властите да соопштат дека се пресретнати ракети над територијата на Катар.
Тензиите во регионот се зголемија откако иранските медиуми пред неколку дена објавија список на потенцијални цели во рамки на конфликтот на Блискиот Исток. На листата, наречена „Нови ирански цели“, се наведени канцеларии и имоти на големи американски технолошки компании што работат во регионот.
Меѓу компаниите споменати во иранските медиуми се Amazon, Microsoft, Nvidia, IBM, Oracle Corporation и Palantir Technologies.
Според истите извори, потенцијалните цели опфаќаат објекти во Израел, но и канцеларии и технолошки центри низ регионот, вклучувајќи ги Дубаи и Абу Даби.
