Во најновите резултати од контролата на јавните здравствени установи, Фондот за здравствено осигурување утврдил сериозни пропусти во повеќе институции. Директорот на ФЗОМ, Сашко Клековски, откри дека во една од нив лековите за итна медицинска помош биле под минималното дозволено ниво за функционално работење, а целосно недостасувале ампули против болки – сериозна состојба што може директно да го загрози здравјето на пациентите.
Покрај ова, во две други здравствени установи е забележано дека пациентите плаќале услуги кои не смееле да се наплаќаат.
Клековски објасни: „Во одредени случаи сметале дека услугата, како транспорт во здравствена установа, е извршена без можност параметрите или индикациите да се проверат. Кај една установа лековите биле под минимумот за нормално функционирање, а кај друга немало доволно екипи според стандардите.“
Контролата открила и сериозни неправилности во неколку клинички центри. Директорите на дел од нив си ги зголемиле платите за 10% – целосно спротивно на законите и колективните договори.
„Имаме два случаи со незаконски зголемени плати, и уште осум случаи каде не се доставени документите за да се внесат податоците за дежурствата и дополнителните активности. Целата документација ја проследуваме до Министерството за здравство, Министерството за финансии и Државниот завод за ревизија“, додаде Клековски.
Установите добиваат рок од два месеци да ги отстранат утврдените недостатоци. По истекот на рокот, Фондот повторно ќе врши контроли за да провери дали обврските се исполнети.
Овие наоди повторно отвораат прашања за транспарентноста, одговорноста и безбедноста во македонскиот здравствен систем.
