Администрацијата на американскиот претседател Доналд Трамп воведува нова имиграциска политика со која значително ќе се отежни добивањето „зелена карта“ за странските државјани кои веќе престојуваат во Соединетите Американски Држави.
Според новите правила, најголемиот дел од барањата за постојан престој ќе мора да се обработуваат преку американските конзулати и амбасади во странство, наместо директно од територијата на САД. Тоа значи дека студентите, туристите и привремените работници повеќе нема да можат едноставно да го сменат својот статус додека се наоѓаат во земјата, освен во случаи што властите ги дефинираат како „вонредни и исклучителни околности“.
Досега, голем број странски државјани ја користеа процедурата позната како „adjustment of status“, преку која можеше да се аплицира за постојан престој без напуштање на САД. Според информациите на „Вашингтон пост“, повеќе од половина од одобрените „зелени карти“ биле издавани токму преку оваа постапка.
Новата политика претставува сериозна промена во американскиот имиграциски систем и може директно да влијае врз илјадници луѓе кои моментално студираат, работат или престојуваат привремено во САД со надеж дека ќе обезбедат постојан престој.
Од Службата за државјанство и имиграција на САД објаснуваат дека мерката е воведена со цел да се намали притисокот врз институциите и да се ослободат ресурси за обработка на други категории предмети. Меѓу нив се барања за визи за жртви на насилен криминал и трговија со луѓе, како и постапки за добивање американско државјанство преку натурализација.
Администрацијата на Трамп уште од почетокот на неговиот втор претседателски мандат започна со значително заострување на имиграциската политика. Во изминатиот период беа воведени построги контроли на границите, ограничувања за дел од визите и засилен надзор врз имиграциските процедури.
Аналитичарите оценуваат дека новите правила може да предизвикаат дополнителен хаос и подолги чекања во американските конзулати ширум светот, бидејќи многу апликанти сега ќе мора да ја напуштат земјата за да ја продолжат постапката за добивање постојан престој.
Критичарите на мерката предупредуваат дека ваквата политика може да создаде несигурност кај странските студенти и работници кои веќе со години живеат и работат во САД, додека поддржувачите на Трамп сметаат дека станува збор за неопходен чекор за построга контрола на имиграцијата и заштита на американскиот систем.
