Иран нема да прифати никаков договор со Соединетите Американски Држави доколку претходно не бидат целосно загарантирани правата и интересите на иранскиот народ, порача претседателот на иранскиот Парламент, Mohammad Bagher Ghalibaf, кој ја предводи иранската страна во разговорите со Вашингтон.
Во обраќање емитувано на државната телевизија, Галибаф истакна дека Техеран нема да даде зелено светло за договор сè додека не добие цврсти гаранции дека националните интереси на земјата ќе бидат целосно заштитени.
Изјавата доаѓа во период кога се појавија информации дека преговорите меѓу двете земји се доближиле до можен договор. Сепак, според извештај на The New York Times, американскиот претседател Donald Trump во меѓувреме доставил нова, построга верзија на предлог-договорот до иранските власти.
Според информациите објавени од Axios, Вашингтон бара поцврсти услови по неколку чувствителни прашања, меѓу кои и иднината на иранскиот нуклеарен материјал.
Од иранска страна, укинувањето на американските санкции и одмрзнувањето на финансиските средства на земјата кои се блокирани во странство остануваат меѓу клучните барања што мора да бидат вклучени во секој евентуален договор.
„Оние што се борат на дипломатскиот фронт не се потпираат на зборови и ветувања од противникот“, порача Галибаф, нагласувајќи дека Техеран ќе инсистира на конкретни гаранции пред да направи каков било компромис.
Новите изјави укажуваат дека и покрај напредокот во разговорите, меѓу двете страни и понатаму постојат сериозни разлики околу клучните прашања кои треба да бидат надминати за да се постигне конечен договор.
