Во авионот на „Флајдубаи“, кој летал од Дубаи кон Тел Авив, имало четворица пилоти – одлука која, според информациите на „Џерусалим пост“, била донесена поради можноста летот да биде продолжен или пренасочен поради безбедносната состојба во регионот.
Дополнителните пилоти требало да овозможат екипажот да остане во рамките на дозволеното работно време доколку маршрутата се продолжи за еден или два часа. Нивното присуство, според изворот на весникот, не било поврзано со претходно безбедносно предупредување.
Токму резервниот екипаж, сепак, станал исклучително важен кога во пилотската кабина дошло до сериозен инцидент. Според израелските власти, копилотот го нападнал и го избодел капетанот, по што авионот почнал нагло да губи височина. Од леталото бил испратен и меѓународниот код 7500, кој означува незаконско мешање или преземање контрола врз леталото.
Според податоците од сервисите за следење летови наведени во текстот, „боингот 737“ за помалку од половина минута изгубил речиси 14.000 стапки, односно околу 4.300 метри височина.
Патници и членови на екипажот успеале да го совладаат осомничениот, а еден од двајцата дополнителни пилоти стигнал до пилотската кабина и ја презел контролата врз авионот. Леталото потоа било пренасочено кон Табук во Саудиска Арабија, каде безбедно слетало.
„Флајдубаи“ потврди дека во пилотската кабина имало физички инцидент и повика да не се претпоставува мотивот додека трае истрагата.
