Украинскиот претседател Володимир Зеленски не успеа да ја сокрие неверицата по изјавите на американскиот претседател Доналд Трамп, кој јавно рече дека рускиот лидер Владимир Путин „сака Украина да успее“ и дека дури понудил конкретна помош. Неочекуваните зборови предизвикаа очигледна реакција кај Зеленски, која камерите веднаш ја забележаа.
Настанот се случи за време на заедничка прес-конференција на Трамп и Зеленски, одржана во резиденцијата Мар-а-Лаго. Во моментот кога американскиот лидер зборуваше за наводната подготвеност на Москва да ѝ помогне на Украина, украинскиот претседател остана со подигнати веѓи и иронична насмевка, што многумина го протолкуваа како јасен знак на неверување.
– Русија сака Украина да успее. Рускиот претседател дури понуди помош со енергија и електрична енергија по ниски цени – изјави Трамп, оставајќи впечаток дека односите меѓу двете земји би можеле да добијат сосема нов тек.
По оваа изјава, новинарите го прашаа Трамп дали Русија би можела да има улога во евентуален мировен договор и во процесот на обновата на Украина. Американскиот претседател одговори потврдно.
– Да, разговаравме за тоа. Русија ќе помогне – додаде Трамп, без да навлегува во детали за формата и обемот на таа помош.
Во продолжение, Трамп откри дека непосредно пред средбата со Зеленски имал телефонски разговор со Владимир Путин кој траел околу два и пол часа. Според неговите зборови, главна тема на разговорот била нуклеарната централа Запорожје, најголемата нуклеарна централа во Европа.
– Путин работи со Украина за повторно да се отвори централата. Не ја напаѓа со ракети. Тој сака таа повторно да биде активна – тврдеше Трамп, додека Зеленски остана молчелив и се воздржа од било каква јавна реакција.
Снимката од оваа прес-конференција, објавена од Белата куќа и споделена на социјалната мрежа Икс, брзо стана вирална. Моментот со реакцијата на Зеленски привлече огромно внимание и отвори бројни прашања за вистинската природа на разговорите меѓу Вашингтон и Москва, како и за можните импликации врз иднината на конфликтот во Украина.
