Силна и опасна бура ја погоди американската сојузна држава Калифорнија, создавајќи услови опасни по живот и принудувајќи стотици луѓе да ги напуштат своите домови токму за време на божиќните празници. Поради екстремните временски услови, гувернерот прогласи вонредна состојба во шест окрузи, додека метеоролозите предупредуваат дека невремето ќе продолжи и во текот на Божиќ, пренесува Скај њуз.
Обилните врнежи го погодија јужниот дел на Калифорнија уште на Бадник, предизвикувајќи широко распространети поплави. На видеоснимки од планински туристички области може да се видат силни порои од кал, камења и отпад како се спуштаат по патиштата, додека надојдената вода навлегува во дворови и тремови на куќи.
Националната метеоролошка служба на САД издаде ретко предупредување за „висок ризик од прекумерни врнежи од дожд“, нагласувајќи дека бурите нема да стивнат ниту за време на Божиќ. Според прогнозите, опасноста од поплави и лизгање на земјиштето останува висока во повеќе региони.
Гувернерот на Калифорнија, Гавин Њусом, соопшти дека прогласувањето вонредна состојба има за цел да овозможи побрза мобилизација на службите за итни интервенции и однапред распоредување на ресурсите, со цел заштита на населението и инфраструктурата.
Во округот Лос Анџелес, локалните власти издадоа околу 130 наредби за евакуација на домови кои се сметаат за високоризични. Дел од овие објекти се наоѓаат во области кои претходно годинава беа сериозно погодени од големи шумски пожари, што дополнително ја зголемува опасноста од одрони и кални свлечишта.
Метеорологот на Националната метеоролошка служба, Мајк Вофорд, објасни дека Јужна Калифорнија вообичаено прима околу 2,5 сантиметри дожд во овој период од годината. Сепак, според актуелните прогнози, многу подрачја би можеле да добијат меѓу 10 и 20 сантиметри дожд за само една недела, додека во планинските области количината може да биде и значително поголема, што ја прави ситуацијата особено сериозна.
