Доцен ноќен вооружен инцидент ја вознемирил истанбулската населба Султанбејли, каде што полицијата се обидела да го уапси 21-годишниот Беркан Ч., осомничен дека бил поврзан со терористичката организација ДЕАШ и дека подготвувал терористички напад во Турција.
Според информациите објавени од истанбулските власти, операцијата била спроведена од турската разузнавачка служба МИТ во координација со истанбулската полиција.
Полицајците го лоцирале осомничениот во близина на автобускиот терминал во Султанбејли, каде што се обиделе да го приведат.
Според досегашните наводи од истрагата, 21-годишникот тогаш отворил оган кон припадниците на полицијата. Полицајците возвратиле, при што осомничениот бил смртно застрелан.
Во вооружениот инцидент бил повреден и цивил кој се нашол во близина. Првичните информации биле дека лицето било повредено и пренесено на медицинска помош, но турските медиуми подоцна објавиле дека цивилот им подлегнал на повредите во болница.
Акцијата следела откако осомничениот, според дополнителните информации, претходно успеал да ги избегне полициските операции на две различни адреси во истанбулските области Пендик и Тузла.
По тие неуспешни обиди за негово пронаоѓање, истражителите добиле информации дека тој се упатил кон Султанбејли и купил автобуски билет од тамошниот терминал.
Полицијата успеала да го лоцира токму на таа локација и започнала акција за негово апсење. Тогаш, според официјалните информации, дошло до престрелката.
На социјалните мрежи во меѓувреме се појавија и видеоснимки од инцидентот. На нив се гледаат полициски припадници кои заземаат позиции и возвраќаат на огнот.
Случајот предизвика големо внимание во Турција поради сомнежите дека младото лице било поврзано со ДЕАШ и дека можело да подготвува напад.
Сепак, истрагата треба да ги утврди сите околности околу случајот, вклучително и природата на неговите наводни контакти со терористичката организација и дали навистина постоеле конкретни планови за извршување напад.
Надлежните турски служби продолжуваат со собирање информации и проверка на сите детали поврзани со полициската операција во Султанбејли.
