Најмалку 11 лица го загубија животот, а уште 16 се повредени во голем пожар што избувнал во деловен објект на тајландскиот туристички остров Пукет. Информацијата ја објави „Ал Џезира“, повикувајќи се на податоци од локалните власти.
Пожарот избувнал денеска околу 3:17 часот по локално време, во туристичкиот центар Патонг. Огнот најпрво ја зафатил зградата во која се наоѓале ресторан, објекти за изнајмување сместување и продавница за изнајмување мотоцикли, а потоа се проширил и на неколку соседни објекти.
Началникот на полицијата во Пукет, Сурачаи Суксаи, изјавил дека истрагата за утврдување на причините за пожарот сè уште е во тек. Сепак, првичните наоди укажуваат дека непосредно пред избувнувањето на огнот експлодирал електричен трансформатор во близина на објектот.
Поради ова, полицијата засега ја исклучила можноста пожарот да бил подметнат.
Гувернерот на Пукет, Чоднарин Кедсом, открил дека во просторот за изнајмување се чувале околу 100 мотоцикли, но и поголеми количества гориво, моторно масло, пластични материјали и гуми.
Според неговата проценка, присуството на овие лесно запаливи материјали веројатно придонело пламените јазици брзо да се прошират, а во објектот да се создаде густ и токсичен чад.
Од вкупно 16 повредени лица, 15 се тајландски државјани, додека едно лице е државјанин на Мјанмар. Локалните власти потврдиле дека меѓу загинатите и повредените нема туристи.
Повредените биле пренесени во болница, каде што добиле медицинска помош поради последиците од вдишување чад, како и повреди предизвикани од скршено стакло.
Пожарот повторно го отвори прашањето за безбедносните стандарди во Тајланд, особено во угостителските објекти, баровите и ноќните клубови. Во земјата и претходно се случиле неколку големи пожари со човечки жртви.
Во јули годинава, околу 40 лица загинаа во пожар што избувнал во преполн бар во главниот град Бангкок. Тогаш властите соопштија дека краток спој во електричната инсталација предизвикал ширење на огнот и чадот.
Претходно, во 2012 година, пожар во ноќен клуб на Пукет, кој бил популарен меѓу туристите, однел четири животи, а голем број луѓе биле повредени.
Една од најтешките вакви несреќи во Тајланд се случила за време на новогодишните прослави во 2009 година, кога во пожар во ноќен клуб во Бангкок загинале 67 лица, а повеќе од 200 биле повредени.
Истрагата за најновиот пожар на Пукет продолжува, а надлежните треба да ги утврдат точните околности под кои избувнал огнот.








