Франција се соочува со една од најсериозните сезони на шумски пожари во последниот период, откако огнените стихии уништија огромни површини шума и вегетација, а десетици семејства беа принудени итно да ги напуштат своите домови.
Според информациите од француските власти, пожарите досега зафатиле речиси 40.000 хектари шуми и ниска вегетација. Во исто време, 111 лица биле приведени под сомнение дека на различни начини можеби придонеле за избувнување на пожарите.
Еден од најтешките пожари избувнал во местото Трињак, во департманот Атлантска Лоара. Таму пламените јазици уништиле шест куќи и зафатиле околу 20 хектари земјиште. Благодарение на брзата реакција на пожарникарите и ангажирањето на специјализирани авиони за гаснење, пожарот бил ставен под контрола.
Сепак, ситуацијата останува критична на повеќе локации.
Во Тарадо, северозападно од заливот Сен Тропе, огнот уништил десетина домови, додека уште околу 50 објекти претрпеле оштетувања. Во овој регион повеќе од 600 пожарникари се борат со огнената стихија, работејќи во исклучително тешки услови поради високите температури, долгата суша и силните ветрови.
Поради опасноста пламените јазици да стигнат до населени места, голем број жители биле евакуирани како превентивна мерка. Многу семејства морале привремено да ги напуштат своите домови додека службите се обидуваат да го стават огнот под контрола.
Француската метеоролошка служба предупреди дека ризикот од нови пожари е особено висок. Во 27 департмани е прогласено високо ниво на опасност од пожари, додека во шест региони е активирано портокалово предупредување поради топлотниот бран.
Министерот за внатрешни работи Лоран Нунјез предупреди дека опасноста не е завршена и дека во наредните денови постои сериозен ризик од ново ширење на пожарите, особено во јужните и југоисточните делови на земјата.
Комбинацијата од екстремна суша, сувата вегетација и силните ветрови создава идеални услови огнот да се движи со голема брзина, што ја отежнува работата на пожарникарските екипи кои непрекинато се борат да спречат уште поголема катастрофа.
