Еден од најбараните луѓе на италијанското подземје конечно е фатен. Чиро Андолфи, по кого се трагаше од 2022 година и кој се наоѓаше на официјалната листа на италијанското Министерство за внатрешни работи меѓу 100-те најопасни бегалци, е уапсен во населбата Бара во Неапол.
Андолфи, 49-годишен мафијашки водач, бил осуден на затворска казна од 8 години, 3 месеци и 10 дена за повеќе тешки кривични дела. Меѓу нив се учество во мафијашка криминална организација, изнуда спроведена со мафијашки методи, како и корупција. И покрај пресудата, тој со години успевал да им избега на безбедносните служби.
Апсењето било извршено на улицата Виа Џулија Лама, во стан каде што Андолфи живеел во целосна изолација. Она што ги изненадило истражителите е начинот на кој успевал да се крие. Во ѕидот на станот бил изграден специјален таен простор, внимателно осмислен за да не биде забележан при рутински проверки.
Влезот во засолништето бил целосно маскиран со радијатор, зад кој се наоѓал отворот кон скривалиштето. Благодарение на ова едноставно, но ефикасно решение, Андолфи успеал да остане невидлив и недостапен за полицијата речиси три години, живеејќи буквално пред очите на јавноста.
Италијанските власти оценуваат дека апсењето претставува сериозен удар врз мафијашките структури во регионот на Неапол и уште еден доказ дека и највнимателно осмислените скривалишта на крајот не можат да ја спречат правдата.
