Најмалку седум лица загинаа во утрински воздушен напад врз пристаништето Ал-Маха во Јемен, соопшти јеменската војска. За нападот одговорност презедоа јеменските бунтовници Хути.
Хутите соопштија дека во нападот биле употребени повеќе балистички ракети и беспилотни летала. Според нивните тврдења, цел на нападот биле припадници на „непријателските саудиски сили“, како и складишта во кои било сместено оружје.
Од Хутите наведуваат дека нападот бил извршен поради нивните тврдења оти Саудиска Арабија го користи пристаништето за засилување и снабдување на силите на јеменската влада распоредени во тој дел од провинцијата Таиз.
Пристаништето Ал-Маха се наоѓа на западниот брег на провинцијата Таиз и има значајна стратешка положба. Од ова подрачје се овозможува влијание врз поморскиот сообраќај во Црвеното Море, како и следење на движењето на танкерите со нафта и бродовите што пристигнуваат од Арапското Море.
Најновиот напад претставува дополнително зголемување на тензиите во Јемен, каде што Хутите со години се во конфликт со јеменската влада и силите кои ја поддржуваат.
