Голем пожар избувнал во туристички комплекс во Москва, при што бил зафатен еден од познатите објекти во градот, познат како „Измаиловски Кремљ“, културно-забавен центар чија архитектура ја имитира познатата московска тврдина.
Според првичните информации објавени од руските медиуми на Телеграм, огнот брзо се проширил и зафатил голема површина од над 3.000 квадратни метри. Пожарот предизвикал сериозна материјална штета, а дел од конструкцијата, во која се наоѓала и просторија за „escape room“ игри, се урнала под силниот интензитет на пламените јазици.
Локалните жители сведочат дека пожарот се развивал брзо и дека густ чад можел да се види од голема оддалеченост. Засега нема информации за повредени или загинати лица, а причината за избувнувањето на пожарот сè уште не е утврдена.
Руските служби за итни случаи спроведуваат истрага и работат на утврдување на околностите под кои дошло до инцидентот, додека дел од медиумите нагласуваат дека точната локација и деталите сè уште се предмет на проверка.
Настанот предизвика големо внимание во јавноста, особено поради големината на комплексот и брзината со која пожарот се проширил низ објектот.
