Украинските власти покренаа истрага против поранешниот командант на 155. механизирана бригада „Ана Киевска“, Станислав Лучанов, кој е осомничен дека заедно со неколку припадници на единицата учествувал во киднапирање и убиство на двајца цивили во Киевската област.
Според соопштението на Генералштабот на украинската армија, Лучанов ја напуштил својата единица без дозвола додека траела истрагата и во моментов се наоѓа во бегство.
Истрагата покажува дека ноќта меѓу 27 и 28 јуни група војници од 155. бригада насилно влегла во дворот на семејна куќа во Киевската област, каде што киднапирале двајца браќа. Според полициски извори, жртвите потоа биле однесени во Полтавската област, каде што биле убиени.
По сериозните обвинувања, врховниот командант на украинската армија, Олександр Сирски, наредил воената служба за внатрешна безбедност и полицијата да спроведат темелна истрага за целиот случај.
Украинскиот портал „Хромадске“, повикувајќи се на извори од истрагата, објави дека досега се приведени деветмина припадници на 155. механизирана бригада. Во меѓувреме, сите војници кои се поврзуваат со случајот се суспендирани од службените должности.
Од Генералштабот порачаа дека доколку се потврдат сомнежите, сите инволвирани ќе сносат кривична одговорност, без оглед на нивниот чин, функција или претходни заслуги.
Воената полиција најави воведување дополнителни мерки за зајакнување на дисциплината во армијата и спречување злоупотреба на службените овластувања.
Овој случај следува само неколку недели по суспензијата на командантот на 425. јуришен полк „Скелија“, против кого исто така се води истрага поради наводно малтретирање на војници, за кое истражителите сомневаат дека можеби е поврзано со 26 смртни случаи надвор од борбени дејства.
Станислав Лучанов ја презеде командата на 155. механизирана бригада во февруари 2026 година, а претходно бил началник на штабот на полкот „Скелија“, кој исто така е предмет на одделна истрага.
