Томас Маркл Постариот (82), таткото на Меган Маркл, е уапсен на Флорида поради сомневање за поседување материјали што прикажуваат сексуална злоупотреба на деца, пренесуваат британските и американските медиуми.
Според објавените информации, агенти на ФБИ го привеле во дом за стари лица во Лејкленд, каде што престојувал во последниот период.
Апсењето следува по меѓународна истрага во која биле откриени илјадници фотографии и видеоматеријали со сомнителна содржина на локации поврзани со него во Филипините и Мексико.
Истрагата започнала откако неговиот син, Томас Маркл Помладиот, пријавил пронаоѓање спорни материјали во поранешниот дом на нивниот татко на Филипините.
Филипинскиот министер за внатрешни работи, Џонвик Ремуља, изјавил дека биле откриени повеќе од 7.000 фотографии и видеоснимки со експлицитна содржина во која се вклучени малолетници.
Истражителите сè уште утврдуваат кому му припаѓаат електронските уреди на кои биле пронајдени материјалите.
Во меѓувреме, мексиканските власти извршиле претрес во складишен простор во Росарито, каде што биле запленети компјутери, УСБ-мемории и други предмети важни за истрагата.
Томас Маркл претходно категорично ги отфрлил обвинувањата, тврдејќи дека никогаш не поседувал вакви материјали. Тој негирал и дека изнајмувал складиште во Мексико.
Во случајот се споменува и неговиот син, кого филипинските власти го означиле како лице од интерес за истрагата, но нагласиле дека засега нема статус на осомничен.
Меган Маркл, која со татко ѝ нема контакт од 2018 година, претходно изјавила дека е длабоко потресена од обвинувањата и загрижена за можните жртви.
Кривичната одговорност на Томас Маркл допрва треба да биде утврдена, а деталите за евентуалното обвинение и понатамошната судска постапка засега не се познати.
