Неколку експлозии денеска беа слушнати во Ријад, а во близина на Меѓународниот аеродром „Крал Калид“ се појавија голем облак од црн чад и пламен. Инцидентот се случи само неколку часа откако саудиските власти ги предупредија жителите на главниот град за можна воздушна закана.
Новинар на АФП кој се наоѓал на местото на настанот видел пожарникари како интервенираат врз изгорен резервоар за гориво на кој било логото на саудискиот нафтен гигант „Арамко“. Фотографии од местото прикажуваат густ црн чад кој се издигнува од просторот за складирање гориво во близина на аеродромот.
Засега нема официјално објаснување од саудиските власти за причината за пожарот. Институциите исто така не го поврзале официјално инцидентот со можен напад од јеменските Хути.
Ситуацијата предизвика сериозни нарушувања во воздушниот сообраќај. На аеродромот „Крал Калид“ биле регистрирани бројни доцнења и откажувања на летови, а сервисот „Flightradar24“ во текот на денот го поставил аеродромот на највисоко ниво на својот индекс за нарушувања, што укажува на значителни проблеми во сообраќајот.
Сведоци за Ројтерс изјавиле дека слушнале повеќе експлозии откако било издадено предупредувањето.
„Видовме црн чад и оган во правец на аеродромот“, изјавил еден од жителите.
Саудиската служба за цивилна заштита во текот на ноќта испратила предупредување до жителите на Ријад, наведувајќи дека градот е изложен на „непријателска воздушна закана“ и повикувајќи ги граѓаните да останат во затворени простории. Подоцна било соопштено дека опасноста поминала.
Предупредувањето претставува прво од ваков вид во саудиската престолнина откако во последните месеци повторно се засилија судирите со Хутите во соседен Јемен.
Во последните недели Хутите, кои имаат поддршка од Иран, извршиле повеќе напади со беспилотни летала и ракети кон Саудиска Арабија. Во четвртокот едно лице загинало, а две биле повредени откако остатоци од пресретнато беспилотно летало паднале во областа Таиф.
Саудиската противвоздушна одбрана претходно пресретнала и беспилотно летало за кое властите во Ријад тврделе дека се движело кон Мека. Хутите, пак, негирале дека нивната цел бил светиот град.
Напнатоста дополнително се зголемила по тврдењата за значително напредување на Хутите долж јеменскиот брег на Црвеното Море. Според наведените информации, тие ја презеле стратешката пристанишна област Мока и островот Перим во теснецот Баб ел-Мандеб, еден од најзначајните поморски коридори во светот.
Саудиска Арабија ја поддржува меѓународно признатата влада на Јемен, а во последните денови извршила повеќе воздушни напади врз позиции на Хутите.
Воениот портпарол на Хутите, Јахја Сари, вчера изјавил дека Саудиска Арабија извршила околу 300 напади врз Јемен во текот на изминатата недела и предупредил дека тие дејствија, според него, нема да останат без одговор.
Советот за безбедност на Обединетите нации вчера ги осуди нападите на Хутите врз Саудиска Арабија и повика на намалување на тензиите и деескалација на конфликтот.
И покрај експлозиите, пожарот и густата црна завеса од чад во близина на аеродромот, засега нема официјална потврда дека денешниот инцидент во Ријад е директна последица на напад од Хутите.
