Топлотните бранови што ја погодија Франција во изминатите неколку месеци би можеле да предизвикаат директни и индиректни економски загуби од 10 до 15 милијарди евра, изјави француската министерка за животна средина Моник Барбју, повикувајќи се на најновите проценки на Националниот институт за статистика и економски истражувања (ИНСЕЕ).
Барбју предупреди дека периодот на екстремни горештини сè уште не е завршен, што значи дека конечната економска штета би можела дополнително да расте.
За споредба, сушата во 2022 година предизвика директни и индиректни трошоци од околу 5,6 милијарди евра. Годинашните топлотни бранови, сепак, траат подолго и се поинтензивни, а дополнителен проблем претставуваат големите шумски пожари и падот на земјоделското производство.
Последиците од продолжената суша веќе директно ги чувствуваат и граѓаните. Според министерката, повеќе од 40.000 луѓе во Франција имаат ограничен пристап до питка вода.
Економистите и научниците предупредуваат дека проблемот е многу поширок и дека рекордните температури и сушата низ Европа ова лето би можеле да предизвикаат загуби од стотици милијарди евра.
Екстремните временски услови го погодуваат земјоделството, енергетиката, речниот транспорт и здравствените системи, додека шумските пожари дополнително ја зголемуваат материјалната штета.
Доколку ваквите услови продолжат, летото 2026 би можело да се вброи меѓу најтешките сезони со екстремни временски непогоди во Европа.
