Доналд Трамп во неделата изјави дека е подготвен да воведе нови санкции кон Русија, но тоа го услови со посилен ангажман од страна на Европа и НАТО-сојузниците. Во изјава за новинарите, Трамп го повтори својот став дека САД не можат да бидат единствените кои преземаат решителни чекори.
„Европа купува нафта од Русија. Не сакам тие да купуваат нафта“, рече Трамп. „А санкциите што ги воведуваат не се доволно строги. Јас сум подготвен да воведам санкции, но тие ќе мора да ги заострат своите санкции пропорционално на она што го правам јас“, додаде тој.
Според Трамп, Европа и НАТО не придонесуваат доволно: „Тие не си ја работат својата работа. НАТО мора да се обедини. Европа мора да се обедини. Не може да се очекува од нас да бидеме единствените што одат напред со полна пареа“.
„Омразата меѓу Зеленски и Путин е несфатлива“
Во врска со можноста за мировни преговори меѓу Украина и Русија, Трамп рече дека омразата меѓу двајцата лидери е толку голема што ги спречува дури и да разговараат: „Тие се мразат толку многу што не можат да дишат“, изјави Трамп, додавајќи дека токму тој би можел да биде посредникот кој ќе ги донесе на иста маса.
„Ќе има разговори. Без разлика дали ќе го наречете самит или само собир, не е важно, но веројатно ќе морам да се вклучам. Тие не се способни да разговараат едни со други“, изјави Трамп.
Трамп: Русија е агресор
Во своето обраќање, Трамп даде невообичаено директна изјава во која ја нарече Русија „агресор“, забележувајќи ги големите човечки загуби од двете страни: „Речиси 8.000 млади војници загинаа оваа недела меѓу двете земји… всушност 8.017 – загинаа оваа недела во таа војна. Знаете, кога сте агресор, губите повеќе. Не знам дали го знаете тоа, но во војна, кога сте агресор, обично губите повеќе.“
„Тие не се американски војници, но сепак се човечки суштества. Тие се души и сакам да ги запрам“, рече Трамп.
Реакции од Конгресот
Изјавите на Трамп наидоа на критики од политичарите во Вашингтон. Конгресменот Адам Смит, врвен демократ во Комитетот за вооружени сили, изјави дека Русија е единствено одговорна за конфликтот.
„Русија нема легитимни безбедносни загрижености што би ги принудиле да ја нападнат Украина. Тие ја започнаа оваа војна. Тие мора да ја завршат“, рече Смит во интервју за „Фокс њуз Сандеј“.
Тој, исто така, ги отфрли обидите да се поврзе трговската војна со Кина со конфликтот во Украина, нагласувајќи дека тоа се одделни прашања и дека поддршката на САД и НАТО за Украина мора да остане недвосмислена.
