Американскиот претседател Доналд Трамп изјави дека не гледа причина за апсење на рускиот лидер Владимир Путин, реагирајќи на новинарско прашање дали би применил исти мерки какви што САД неодамна презедоа кон Николас Мадуро.
Изјавата беше дадена за време на состанок со директори на големи нафтени компании, кога Трамп беше директно прашан дали сценариото од Венецуела може да се повтори и со Русија. Неговиот одговор беше краток, но јасен – не мисли дека таков чекор ќе биде потребен.
„Со него секогаш сум имал добар однос. Многу сум разочаран од развојот на настаните. Во мојот мандат завршив осум војни и искрено мислев дека оваа ќе биде меѓу полесните за решавање“, рече Трамп, алудирајќи на конфликтот во Украина.
Американскиот претседател повтори дека верува оти постои простор за договор што би довел до крај на војната, но не откри конкретни детали ниту временска рамка за евентуален напредок. Според него, дипломатско решение сè уште е возможно, иако призна дека ситуацијата е покомплицирана отколку што првично очекувал.
Изјавата на Трамп доаѓа во период на засилени глобални тензии и по чекорите што Вашингтон ги презеде против Венецуела, што отвори шпекулации дали сличен пристап би можел да се прошири и кон Москва. Засега, од Белата куќа нема најава за радикални потези кон Русија, а Трамп остава впечаток дека преферира политичко решение наместо директна конфронтација.
