Над Лос Анџелес во четвртокот беше забележан еден од најтајните авиони во арсеналот на американската војска, што веднаш предизвика бурни реакции и шпекулации на социјалните мрежи. Станува збор за E-4B Nightwatch – летечки команден центар наменет за употреба во најекстремни ситуации, вклучително и глобални безбедносни кризи.
Снимките од авионот, кој ретко се гледа во јавноста, брзо се проширија онлајн и покренаа прашања зошто токму сега е активиран и зошто летал над еден од најголемите американски градови. Подоцна беше потврдено дека во авионот се наоѓал американскиот министер за одбрана, кој патувал од Вашингтон кон Калифорнија.
Иако официјално е наведено дека станува збор за работна посета и состаноци поврзани со националната безбедност, останува нејасно зошто е користен токму овој авион, наместо стандарден владин лет. Министерството за одбрана засега не даде дополнителни појаснувања.
E-4B е специјално опремен да функционира дури и во услови на целосен колапс на копнената инфраструктура. Отпорен е на електромагнетни напади, може да остане во воздух со денови и служи како мобилен штаб за највисокото државно и воено раководство.
Последен пат овој авион беше активиран во реална кризна ситуација по нападите на 11 септември 2001 година. Токму затоа, неговото појавување повторно го разбуди сомнежот дека зад сцената се одвива нешто многу посериозно отколку што официјално се соопштува.
