Трамп најави обнова на затворот Алкатраз за најопасните криминалци
Американскиот претседател Доналд Трамп објави дека му наредил на Бирото за затвори да го обнови и повторно отвори озлогласениот затвор Алкатраз во заливот Сан Франциско, со цел да ги смести „најсуровите и најнасилните криминалци во Америка“.
„Обновете го и отворете го Алкатраз! Кога бевме посериозна нација, во минатото не се двоумевме да ги затвориме најопасните криминалци и да ги држиме подалеку од секого на кого би можеле да му наштетат“, напиша Трамп на социјалната платформа Трут Соушл.
Алкатраз, кој бил дом за некои од најпознатите криминалци во Америка, вклучувајќи го и Ал Капоне, беше затворен во 1963 година. Денес, тоа е една од најпопуларните туристички атракции во Сан Франциско.
Трамп додаде: „Денеска му наложувам на Бирото за затвори, заедно со Министерството за правда, ФБИ и Службата за внатрешна безбедност, повторно да го отворат значително проширениот и реновиран Алкатраз“.
Алкатраз бил познат како најбезбеден затвор во Америка поради неговата островска локација, ладните води и силните струи кои го опкружуваат. Никогаш не е официјално забележано успешно бегство од затворот, иако петмина затвореници се сметаат за исчезнати, со претпоставка дека се удавиле.
Затворот беше затворен во 1963 година, бидејќи неговото работење било многу скапо, главно поради неговата локација на островот. Одржувањето на Алкатраз било речиси три пати поскапо отколку кој било друг федерален затвор, според податоците од Федералното биро за затвори.
