Екстремните летни температури во Јапонија оставија тешки последици и врз животните. Три лава од зоолошката градина Тама во Токио починале, а неколку други се на лекување поради сомневање дека претрпеле топлотен удар.
Од зоолошката градина информираат дека од средината на јули кај голем број лавови биле забележани сериозни промени – намален апетит и значително намалена активност. Од вкупно 16 лавови, кај 10 биле забележани симптоми, а три лавици починале во период од неколку дена.
Ветеринарите се сомневаат дека причината за смртта е топлотен удар, бидејќи кај животните биле забележани знаци на дехидрација и откажување на повеќе органи.
Иако лавовите се сметаат за животни кои можат да поднесат високи температури, од зоолошката градина објаснуваат дека условите во Јапонија се специфични поради комбинацијата од голема топлина и висока влажност.
„Жештината овде е различна од сувиот воздух во Африка. Поради тоа ги засилуваме мерките за заштита“, изјавиле од установата.
За да им помогнат на животните полесно да ги издржат високите температури, вработените вовеле дополнителни мерки – прскање вода, подобрување на вентилацијата и поставување клима-уреди во одредени простории.
Неколку други лавови и понатаму се под ветеринарен надзор и добиваат терапија.
Јапонија ова лето се соочува со едни од најтешките горештини во историјата. Во одредени делови од земјата температурите достигнаа околу 40 степени Целзиусови, што доведе до воведување на нова категорија за екстремно топол ден.
Последиците од жештините ги почувствувале и луѓето. Само во периодот од 20 до 26 јули, околу 18.600 лица биле пренесени во болница поради топлотен удар, а десетици луѓе починале.
Поради опасните температури, властите во последните години почнаа да менуваат термини на различни културни и спортски настани, со цел да се намали ризикот за здравјето на учесниците и посетителите.
Експертите предупредуваат дека климатските промени придонесуваат за сè почести и поинтензивни топлотни бранови, не само во Јапонија туку и во многу други делови од светот.
