Додека на фронтот во Украина се води крвава битка за еден град која би можела да ја одреди иднината на целиот регион Донбас, Русија, според последните проценки, контролира околу 116.000 км² украинска територија. Таа површина најмногу одговара на вкупната територија на Бугарија (110.994 км²). Моменталната состојба на фронтот не е поволна ниту за Киев, ниту за Москва, па затоа двете страни сè повеќе се потпираат на долгометни удари врз поголемите градови.
Војната влезе во фаза на голем застој. Во меѓувреме, Киев ја презеде иницијативата со жестоки напади врз руските рафинерии и стратешки цели длабоко во Русија, што предизвика сериозни недостизи на гориво на пумпите во руските градови. Големиот украински напад од 18 јуни предизвика катастрофален пожар во рафинерија на југоистокот на Москва, додека на окупираниот полуостров Крим во петокот беше прогласена вонредна состојба.
Рускиот претседател Владимир Путин јавно ги призна последиците од овие напади, наведувајќи дека земјата минува низ „тешко“ време, но дека Кремљ работи на ублажување на последиците врз енергетската инфраструктура.
Застој на фронтот и преговорите
Западните аналитичари сметаат дека украинските напади го забавиле напредувањето на Русија, зголемувајќи го притисокот врз Кремљ да седне на преговарачка маса. Сепак, мировните преговори се во застој поради територијалните спорови.
Путин неодамна изјави дека Москва е подготвена да ги обнови преговорите врз основа на она што беше предложено во Истанбул во 2022 година. Тоа го вклучува и руското барање за предавање на Донбас, каде што Луганск е целосно под руска контрола, додека во Доњецк Украина сè уште држи критични 19% од територијата (околу 6.500 км²).
Појасот на тврдини во Доњецк
Според пишувањата на светските медиуми, на ова подрачје живеат повеќе од 200.000 Украинци, а тука се наоѓаат утврдените градови: Костјантинивка, Словјанск, Покровск и Краматорск. Руските сили ги продолжија офанзивите во овие правци, но без значителен напредок.
Костјантинивка се смета за „порта“ за остатокот од Донбас. Според извештаите, руските трупи се инфилтрирале во градот и се обидуваат да го опколат, додека украинската војска наведува дека целата област е во „сива зона“ контролирана од дронови. Доколку овој град падне, руските сили би можеле да тргнат кон Краматорск и Словјанск, со што би се приближиле до целосно заземање на Донбас.
Што контролира Русија во моментов?
Доњецката, Луганската област, Крим и делови од Херсонската и Запорошката област кои се под руска контрола сочинуваат околу 115.000 квадратни километри. Тоа е територија поголема од цела Србија и Црна Гора заедно (чија заедничка површина изнесува околу 102.172 км²).
Според меѓународните проценки, Русија контролира околу 19,35% од територијата на Украина. Според податоците од теренот, Москва има контрола врз:
- Околу 90% од Донбас (100% од Луганск и околу 85% од Доњецк)
- Околу 75-80% од областите Запорожје и Херсон
- Помали делови од Харковската, Сумската, Николаевската и Днепропетровската област
- Полуостровот Крим, кој беше анектиран во 2014 година.
Во меѓувреме, украинските сили ја продолжуваат кампањата на удари со среден дострел врз руските воени цели, вклучувајќи го и клучниот мост кај Новоазовск, кој Русите го користат за логистика долж автопатот Ростов-Крим.
Зеленски: Имаа 15 рокови за заземање на Доњецк
Украина ги исмеа руските напори за целосно заземање на регионот. Претседателот Володимир Зеленски изјави дека руското раководство е опседнато со Донбас и дека од почетокот на инвазијата руската војска добила дури 15 различни рокови за негово освојување.
„Веќе 15 пати ја негуваа таа илузија дека целосно ќе го заземат Донбас“, изјави Зеленски, додавајќи дека крајниот рок за оваа година сега е поместен за 31 декември.
Путин најавува продолжување на војната
Од друга страна, Путин изјави дека Москва очекува продолжување на дипломатските напори по решавањето на кризите на Блискиот Исток, но порача дека Русија ќе ја продолжи војната во Украина. Тој ги одби предлозите на Киев за ограничување на употребата на ракети со долг дострел и прекин на непријателствата.
Според неговите зборови, Киев го предложил тоа бидејќи украинските сили се под силен притисок долж линијата на фронтот која се протега на 1.250 километри. Путин нагласи дека руските контраудари се многу посурови и дека спасувањето на актуелниот режим во Киев не е дел од плановите на Москва.
