Директорот на ЦИА остварил двочасовна средба со новата претседателка на Венецуела, Делси Родригез, настан што веќе се оценува како пресвртница во односите меѓу Каракас и Вашингтон. Средбата се случила околу две недели по апсењето на поранешниот лидер Николас Мадуро од страна на американските сили, јавуваат меѓународните медиуми.
Според информации од американски извори, главната цел на разговорите била воспоставување директна комуникација и градење меѓусебна доверба. На маса биле ставени теми поврзани со идната економска соработка, но и безбедносните прашања, при што САД бараат Венецуела повеќе да не биде простор за делување на нивни геополитички противници. Средбата е опишана како историска, бидејќи ова е првпат висок американски функционер од ваков ранг официјално да ја посети земјата.
Истовремено со состанокот, Родригез се обрати и пред нацијата, најавувајќи сериозни промени во енергетскиот сектор. Таа порача дека е подготвена за политички дијалог со САД, но нагласи дека Венецуела ќе го брани својот суверенитет. Најавени се и реформи во нафтеното законодавство, со цел отворање на пазарот за странски инвестиции, како и формирање суверени фондови за социјална заштита и инфраструктура.
Во меѓувреме, од Вашингтон пристигнаа пораки дека американските нафтени компании би можеле да се вклучат во венецуелската економија, но под строга контрола на САД. Сето ова се случува во момент кога земјата се соочува со длабока економска криза, висока инфлација и пад на животниот стандард, што дополнително ја зголемува тежината на овој неочекуван дипломатски потег.
