Трамп се закани со нови напади врз Иран: „Можеби ќе продолжиме“
Американскиот претседател Доналд Трамп повторно упати сериозно предупредување до Иран, изјавувајќи дека Соединетите Американски Држави би можеле да продолжат со воените напади врз земјата.
Во разговор со новинарите пред Белата куќа, Трамп порача дека американската војска веќе му нанела големи загуби на Иран, но дека воената операција можеби не е завршена.
„Другите претседатели одамна требаше да го направат ова, да влезат во војна со Иран. Силно ги погодивме и можеби ќе продолжиме со нападите“, изјави Трамп.
Американскиот претседател призна дека војната предизвикува поделени реакции во американската јавност, но нагласи дека негов главен приоритет останува спречувањето на Иран да развие нуклеарно оружје.
„Постои цена што мора да се плати. Тоа го знаев уште кога ја донесов одлуката. Но, не можеме да дозволиме Иран да има нуклеарно оружје“, порача тој.
Во меѓувреме, според информации на „Њујорк тајмс“, американската и израелската војска разработиле планови за нови напади врз Иран по изборите за американскиот Конгрес, закажани за 3 ноември.
Меѓу можните цели се иранските нуклеарни постројки, енергетската инфраструктура и складиштата за ракети и беспилотни летала.
Сепак, конечна одлука за нова воена операција не е донесена.
Војната меѓу САД, Израел и Иран започна на 28 февруари годинава, а судирите предизвикаа сериозна нестабилност на Блискиот Исток.
Дополнителна загриженост предизвикува состојбата во Ормускиот Теснец, кој е еден од најважните поморски премини за светската трговија со нафта.
Иако дипломатските напори продолжуваат, најновите изјави на Трамп покажуваат дека можноста за нова воена ескалација сè уште е отворена.
