Бразил изрази „длабока загриженост“ по стапувањето во сила на ограничувањата на Европската Унија за увоз на пилешко и говедско месо, откако Брисел побара дополнителни гаранции дека бразилското производство е усогласено со европските правила за употреба на антибиотици во сточарството.
Според образложението, проблемот не значи дека во секое бразилско месо се пронајдени антибиотици, туку дека ЕУ смета оти Бразил не обезбедил доволни гаранции за усогласеност со нејзините санитарни барања и правилата против одредени практики при употребата на антимикробни средства.
Бразилските министерства за надворешни работи и земјоделство соопштија дека очекуваат тековниот технички дијалог со европските институции да доведе до брзо и научно засновано решение.
Бразил претходно беше отстранет од листата на земји за кои ЕУ признава усогласеност со релевантните правила за употреба на антибиотици во сточарството.
Прашањето е особено значајно поради обемот на трговијата меѓу двете страни. Во 2025 година Бразил бил втор најголем снабдувач на ЕУ со говедско месо, со извоз од над 92.000 тони во вредност поголема од 713 милиони евра.
Одлуката доаѓа и во чувствителен период за трговските односи со јужноамериканскиот блок Меркосур, во кој покрај Бразил членуваат Аргентина, Уругвај и Парагвај.
Бразилските власти сега очекуваат преку разговорите со Брисел да докажат дека нивниот систем ги исполнува европските барања и да овозможат повторно непречен пристап на производите на пазарот на ЕУ.
