Францускиот претседател Emmanuel Macron соопшти дека имал детални разговори со американскиот претседател Доналд Трамп за ситуацијата на Блискиот Исток, при што ја нагласил поддршката за напорите за постигнување договор меѓу САД и Иран.
Макрон оцени дека тековните дипломатски напори претставуваат значајна можност за создавање нова безбедносна рамка во регионот, која би можела да обезбеди долгорочна стабилност и вклучување на сите релевантни страни.
Тој истакна дека Франција не останува пасивна и е подготвена да преземе оперативна улога откако ќе се постигне договор. Во тој контекст, најави меѓународна мисија развиена заедно со Обединетото Кралство и други партнери, која би се распоредила на терен веднаш по евентуален договор меѓу Вашингтон и Техеран.
Мисијата би имала задача да придонесе за безбедноста на поморскиот сообраќај во Ормутскиот теснец, како и за поширока стабилизација на регионот.
Дополнително, Франција е подготвена да ги стави на располагање своите дипломатски и воени капацитети во идните преговори, особено во делот поврзан со нуклеарното прашање.
Макрон исто така ја поздрави посветеноста на САД кон суверенитетот на Либан и ја нагласи потребата од траен прекин на огнот и меѓународна поддршка за либанските институции.
Во меѓувреме, Париз побара итен состанок на Советот за безбедност на ОН поради ескалацијата на конфликтот во регионот.
