Само три месеци откако се венчале и во период кога го очекувале своето прво дете, животите на 25-годишниот Италијанец Шон Микиели и 26-годишната Бразилка Габриел Кверино завршиле трагично по несреќа во Венеција.
Младиот брачен пар загинал по судирот на нивниот мал брод со водно такси во Венецијанската лагуна.
Двојката тргнала од островот Бурано околу 5 часот наутро. Микиели работел како рибар, а неговата сопруга често го придружувала. И тоа утро заедно тргнале да набават мамка за риболов.
Околу половина час подоцна, нивниот брод се судрил со водно такси во каналот Тесера, кој ја поврзува Венеција со областа околу аеродромот „Марко Поло“.
Микиели бил извлечен од водата со тешка повреда на главата и итно бил пренесен во болница во Местре, каде што лекарите извршиле операција. И покрај напорите за негово спасување, тој починал.
Неговата сопруга по судирот исчезнала во лагуната, по што започнала голема потрага по неа.
Во потрагата биле вклучени нуркачи, пожарникари, карабинери и хеликоптери. Претходно во водата биле пронајдени нејзината чанта, документите и други лични предмети.
По три дена потрага, телото на Габриел било пронајдено во близина на островот Кампалто, на околу два километра од местото каде што дошло до судирот.
„За жал, телото на Габриел Кверино беше пронајдено во лагуната. Ова откритие става крај на последната надеж“, изјавила Симоне Вентурини, претставничка на градските власти во Венеција.
Возачот на водното такси под истрага
Италијанското обвинителство отворило истрага за околностите на несреќата, а 38-годишниот возач на водното такси е под истрага.
Тој на истражителите им кажал дека пред судирот не го забележал малиот брод.
Сега надлежните проверуваат со која брзина се движело водното такси, дали светлата биле правилно користени и дали при маневрирањето биле направени пропусти кои можеле да придонесат за несреќата.
Дополнителна тешкотија за истрагата е фактот што на делот од каналот каде што се случил судирот нема камери кои ја снимиле несреќата.
Истражителите се обидуваат да ги пронајдат и двајцата американски туристи кои во моментот на несреќата биле патници во водното такси. Тие би можеле да дадат важни информации за случувањата непосредно пред и за време на судирот.
Обвинителството наредило и обдукција на двете жртви, како дел од истрагата за утврдување на сите околности на трагичниот настан.
Габриел Кверино потекнувала од Рибеирао Прето во Бразил, а околу две години живеела во Италија. Таа и Микиели се венчале на граѓанска церемонија во Венеција во јуни годинава.
