Нова полемика околу политиката за азил и престој во Германија се отвори откако беше откриено дека дел од мигрантите од Западен Балкан, кои добиле можност да останат во Келн, во исто време биле опфатени со кривични истраги за различни сериозни дела.
Станува збор за лица кои претходно имале обврска да ја напуштат Германија, но во есента 2024 година биле вклучени во градската програма за регулирање на престојот и интеграција. Според информациите објавени од „Фокус онлајн“, во тој период против лица опфатени со програмата биле евидентирани повеќе од 150 кривични постапки.
Само во 2026 година, против 76 од вкупно 153 лица во програмата, биле отворени речиси 100 кривични истраги. Меѓу пријавените и истражуваните дела се наведуваат силување, сексуална злоупотреба на деца, ширење детска порнографија, грабежи, нанесување тешки телесни повреди, трговија со кокаин и перење пари.
Случајот датира од есента 2024 година, кога Централната канцеларија за странци во Кесфелд му понудила на Келн да обезбеди заменски патни исправи за 471 одбиен барател на азил од земјите од Западен Балкан. Со обезбедувањето на документите би се создале услови за спроведување на нивната депортација.
Сепак, одделот во Келн задолжен за регулирање на престојот не ја прифатил понудата. Наместо тоа, било одлучено лицата со долгорочен толериран престој да бидат вклучени во процес на интеграција во германското општество, со помош од социјални работници.
Во проектот тогаш биле вклучени 218 лица од списокот доставен од Кесфелд. Подоцна било утврдено дека 119 од нив веќе имале полициско досие.
Од градската управа, сепак, нагласуваат дека постоењето полициско досие или тековна кривична истрага не значи дека лицето е виновно или дека ќе биде осудено.
Според градските власти, правилата за програмата за престој, усвоени од градскиот совет во март 2021 година, предвидуваат дека самото постоење криминално досие не претставува автоматска пречка за учество во програмата.
Исклучок, според објаснувањето на властите, се лицата кои имаат правосилна затворска казна од шест месеци или повеќе.
Од Келн најавиле дека актуелната проверка треба да покаже како биле третирани кривичните случаи во рамките на програмата и дали биле исполнети сите услови.
„Тековната проверка, која го опфаќа и начинот на кој се постапува со кривичните случаи во рамките на програмата за престој, ќе покаже дали овие услови биле почитувани и дали се потребни дополнителни мерки или промени“, изјавил портпарол на градот.
Евидентирани и истраги за сексуални и насилни кривични дела
Од 155 кривични истраги евидентирани во есента 2024 година, дури 49 биле поврзани со различни форми на кражби – од кражби на автомобили и организирани кражби до вооружени грабежи.
Во евиденцијата имало и постапки поврзани со сексуална злоупотреба на деца, силување, тешки грабежи, нанесување тешки телесни повреди и напади врз полициски службеници.
Покрај тоа, биле регистрирани истраги за измама со социјална помош и фалсификување документи.
Само три од евидентираните случаи се однесувале исклучиво на незаконски престој.
Случајот повторно го отвори прашањето дали криминалните досиеја на лицата биле доволно детално проверени пред нивното вклучување во програмата за престој.
Од градската управа, меѓутоа, посочуваат дека податоците од полициската евиденција не даваат секогаш целосна слика за тоа како завршила конкретната постапка.
Според објаснувањето на градските власти, самата информација дека против некого се водела истрага не покажува дали таа подоцна била прекината, дали било поднесено обвинение или дали на крајот дошло до осудителна пресуда.
Токму затоа, од градот посочуваат дека самото постоење на полициска евиденција не може автоматски да се изедначи со докажана вина, а актуелната проверка треба да утврди дали во досегашното спроведување на програмата биле почитувани сите пропишани услови.
