Трамп со сочувство по нападот во Вашингтон: „Омразата нема место во Америка“
ВАШИНГТОН – Американската државна обвинителка Пам Бонди изјави дека неколкупати разговарала со претседателот Доналд Трамп по вооружениот напад пред Еврејскиот музеј во Вашингтон, при што беа убиени двајца вработени во израелската амбасада.
„Во име на претседателот, неговите молитви се со сите нас – со еврејската заедница, со граѓаните на Вашингтон и со сите кои работат на истрагата: државни, локални и федерални институции, како и со нашата извонредна обвинителка Џанин Пиро, која ќе го предводи случајот“, изјави Бонди на прес-конференција.
Кратко потоа, претседателот Доналд Трамп испрати порака со сочувство преку социјалната мрежа Truth Social, изразувајќи го своето огорчување поради нападот што го нарече „очигледно мотивиран од антисемитизам“.
„Овие ужасни убиства во Вашингтон, очигледно мотивирани од омраза кон еврејската заедница, мора веднаш да престанат! Омразата и радикализмот немаат место во САД. Упатувам длабоко сочувство до семејствата на жртвите. Жално е што вакви нешта сè уште се случуваат во нашето општество. Нека Бог ве благослови сите“, напиша Трамп.
Нападот пред Еврејскиот музеј ја потресе американската јавност и предизвика бран реакции од политичари, верски лидери и претставници на дипломатскиот кор. Истражните органи продолжуваат со истрагата, а сторителот е веќе во притвор.
