Речиси половина од вкупните трошоци на домаќинствата во Европската Унија се концентрирани во само три категории – храна, домување и транспорт.
Според податоците на Евростат за јануари 2026 година, овие трошоци заедно сочинувале дури 46 проценти од вкупната потрошувачка на домаќинствата.
Станува збор за храна и безалкохолни пијалаци, домување, вода и енергија, како и транспорт. Токму овие категории во изминатиот период беа погодени и од значителни ценовни зголемувања, поради што имаат големо влијание врз семејните буџети.
Во споредба со јануари 2025 година, најголем раст на учеството во потрошувачката е забележан кај рекреацијата, спортот и културата – за 1,2 процентни поени.
Повеќе пари се издвојувале и за ресторани и сместување, каде уделот пораснал за 0,3 процентни поени, како и за образование, со раст од 0,1 процентен поен.
Од друга страна, најголемо намалување е забележано кај транспортот, чиј удел во вкупните расходи се намалил за 0,4 процентни поени. Кај информациите и комуникациите е регистриран пад од 0,3 процентни поени.
