Рускиот претседател Владимир Путин испрати остра порака за време на прес-конференцијата по самитот на Шангајската организација за соработка (ШОС) во Бишкек, користејќи необична метафора за да ја опише подготвеноста на Русија да ги брани своите интереси.
Путин порача дека секој што би се обидел да ја „проголта“ Русија може да се соочи со силен одговор.
„Ако некој се обиде да ја проголта Русија, може да добие тупаница во забите“, изјави рускиот претседател.
Неговата изјава била поврзана со претходната метафора во која Путин зборувал за односот меѓу големите сили и користел споредба со животни во природата. Тој дополнително објаснил дека пораката се однесува на оние кои би сакале Русија да ја стават во послаба позиција или да ја „проголтаат“.
Рускиот лидер, исто така, зборувал за ситуацијата поврзана со Украина и за безбедносните ризици, посочувајќи дека Москва ќе бара начин да одговори доколку се реализираат заканите што, според него, биле упатени кон цивилната авијација.
Говорејќи за ШОС, Путин ја оцени организацијата како едно од најзначајните регионални здруженија, со членки и партнери кои зафаќаат огромен дел од светот.
Тој истакна дека понатамошното проширување на организацијата треба да се одвива постепено и внимателно, со цел да се зачува нејзината ефикасност.
Самитот во Бишкек беше посветен на низа меѓународни и регионални прашања, а лидерите разговараа и за економската соработка, безбедноста и идниот развој на организацијата.
