Русија го ослободи Роберт Гилман, поранешен американски маринец, кој од 2022 година се наоѓаше во руски затвор, а американскиот претседател Доналд Трамп соопшти дека одлуката следела по негов разговор со рускиот претседател Владимир Путин.
Според американски официјални лица, 32-годишниот Гилман бил ослободен откако Путин го помилувал поради неговата нарушена здравствена состојба.
Американските власти претходно барале негово ослободување за да може да се врати во САД и таму да продолжи со лекување.
Трамп ја поздрави одлуката на Москва и нагласи дека за ослободувањето не била договорена размена на затвореници.
„Ја цениме оваа одлука и фактот што Русија не побара никого за возврат – немаше никаква размена“, изјави Трамп.
Гилман бил уапсен во јануари 2022 година додека патувал со воз, а потоа бил затворен во Воронеж.
Според руските државни медиуми, тој бил обвинет дека во алкохолизирана состојба удрил полицаец, по што бил осуден на четири и пол години затвор.
По ослободувањето, Гилман со авион на американскиот Стејт департмент се упатил кон САД, а неговото пристигнување е предвидено на аеродромот „Вашингтон Далес“.
