Претседателот на Парагвај, Сантијаго Пења, е разрешен од функцијата и ставен во домашен притвор по финансискиот колапс на банката „Уено“, поврзана со неговите поранешни приватни деловни интереси.
Одлуката следува по банкарската криза поради која, според објавените информации, околу три милиони штедачи останале без пристап до своите заштеди и пензиски средства.
Пења бил уапсен во петокот, само неколку минути откако парламентот изгласал негово разрешување. За смената гласале 44 сенатори, вклучувајќи и претставници на неговата партија.
Иако претходно понудил оставка, пратениците одлучиле да спроведат постапка за импичмент, со што Пења го загубил претседателскиот имунитет.
Против него се изнесени обвинувања за судир на интереси, злоупотреба на положбата, влијание врз регулаторниот надзор и наводно пренасочување пензиски средства.
Поранешниот претседател ги отфрла обвинувањата и негира каква било незаконска активност.
Обвинителството најавило негово сослушување поради сомневања за злоупотреба на доверба, трговија со влијание и незаконско присвојување средства.
По разрешувањето на Пења, претседателската функција ја презел досегашниот потпретседател Педро Алијана, кој положил заклетва и треба да ја води државата до 2028 година.
Алијана ветил дека граѓаните погодени од финансискиот колапс ќе бидат обесштетени.
Во меѓувреме, банкарската криза предизвикала масовни протести низ Парагвај. Илјадници граѓани излегле на улиците, барајќи итно враќање на своите пари.
Пред банките во главниот град Асунсион се формирале долги редици од граѓани кои се обидувале да дојдат до своите заштеди.
Случајот предизвика сериозна политичка и финансиска криза во земјата, додека истрагата за одговорноста за пропаѓањето на банката продолжува.
