Истражителите кои работат на расветлување на тешката железничка несреќа во Шпанија дојдоа до сериозно откритие кое може целосно да го промени текот на истрагата. Според информации објавени од „Ројтерс“, на самото место на излетувањето на возот бил пронајден сериозно оштетен дел од шината, за кој се верува дека е директен виновник за трагедијата.
Станува збор за дефектен спој помеѓу шините, познат како „рибја плоча“, кој бил скршен и видно истрошен. Експертите кои ја анализирале состојбата утврдиле дека абењето не е од скоро време, што укажува дека проблемот постоел подолг период, без навремена интервенција.
Техничките тимови сметаат дека токму овој структурен дефект довел до губење на стабилноста на пругата и излетување на возот од шините со катастрофални последици.
Претходно, претседателот на шпанската државна железничка компанија „Ренфе“, Алваро Фернандез Хередија, јавно изјави дека човечка грешка речиси сигурно не е причина за несреќата, што дополнително ја зацврстува тезата за технички пропуст.
Иако спорниот дел од железничката линија бил целосно реконструиран во мај минатата година, според достапните информации, проблемите на таа делница продолжиле да се појавуваат и по обновата.
Истрагата сè уште е во тек, а надлежните служби најавуваат дополнителни анализи кои треба да утврдат дали станува збор за сериозен пропуст во одржувањето на инфраструктурата.
