И покрај постепеното слабеење на топлотниот бран, големи шумски пожари, суши и силни невремиња продолжуваат да создаваат сериозни проблеми во повеќе европски земји. Властите предупредуваат дека во наредните денови повторно се очекуваат екстремно високи температури и зголемен ризик од нови пожари.
Најкритична е состојбата во Шпанија, каде што голем пожар во регионот Арагон зафатил повеќе од 12.000 хектари. Во гаснењето учествуваат стотици пожарникари, воени единици и десетици летала, а евакуирани се повеќе од 1.000 жители. Метеоролозите предупредуваат дека следната недела температурите во делови од земјата би можеле да достигнат и до 44 степени.
Во Франција сушата дополнително се влошува, а високите температури создаваат проблеми и во енергетскиот сектор. Во Германија, пак, нискиот водостој на Рајна го отежнува речниот транспорт и ги зголемува трошоците.
Во меѓувреме, делови од Франција и Германија беа погодени од силни бури, при што загинаа три лица. Во околината на Штутгарт беше регистрирано невреме со силен ветер и град со големина до пет сантиметри.
Светската здравствена организација предупреди дека Европа ја очекуваат нови опасни топлотни бранови и ги повика властите екстремните горештини да ги третираат како сериозна закана за јавното здравје.
